دروس الحياة
دروس الحياة
بتبقى حاجة نفسك فيها اوي.. ومابتحصلش وموضوع عمال تخطط له.. ومابيجيش وحد بتحبه أوي.. ومابيحبكش
وناس بتعمل كل حاجة عشان تبسطها.. و ف الاخر بتخذلك وبتأذيك !!
مشاعر بتحس إنها مهدرة، وأهداف مابتتحققش، وناس مابنكملش معاهم، وطاقة ووقت بيضيعوا في سراب... بس الحاجة الوحيدة اللي بتنقذ الواحد ساعتها من كم الإحباط اللي بيجي له، هي إيمانه بأن "وعسى أن تكرهوا شيئاً وهو خيرٌ لكم، وعسى أن تحبوا شيئاً وهو شرٌ لكم.. والله يعلم وأنتم لا تعلمون"
بتمر الأيام وتكتشف إن المشاعر دي مكانتش مهدرة... إنت بقيت أقوى أو أحنّ أو أذكى أو أكثر عطاءا..
والأهداف اللي ماتحققتش ماكنتش خير. يمكن ربنا منع عنك أذى تاني أو إدالك حاجة أحسن أو حققهالك في وقت أنسب أو علمك درس مكنتش هتتعلمه غير لو فشلت..
والناس اللي مكملتش معاهم مكانوش بيحبوك، أو مكانوش هيبسطوك، مكانش ليك خير معاهم وربنا بدلك بأحسن منهم.. أو علمك إزي تختار أحسن أو إزاي تحافظ على حبايبك أكتر
والوقت والطاقة اللي ضاعوا إنت كنت محتاجهم يضيعوا عشان تتعلم حاجة مكنتش هتتعلمها لو كل حاجة مشيت بالمسطرة !!
مابين الإحباط من الفشل والرضا بقدر الله "يقين" إن ده الخير حتى لو إنت حزين جداً ومش شايف ده دلوقتي.. و"صبر" وإنت مطمن إن الحقيقة الوحيدة الثابتة في حياتك هي إنه سبحانه وتعالى أعلم باللي أحسن لك منك.
"ألا يعلم من خلق وهو اللطيف الخبير"
ادعوا دايما ربنا يراضيكم باللي كتبهولكم
"واقدر لي الخير حيث كان.. ثم إرضني به "
ليست هناك تعليقات