ازاي_ندرب_اولادنا_علي_الصيام_في_رمضان ؟ #سنة_أولى_صيام
#سنة_أولى_صيام
دايما كل الامهات بتبدأ تدرب اولادها ع الصيام بأنهم يصوموا نص يوم في البداية علشان نقلل مشقة الصيام عليهم ... ده كلام سليم وصح
بس علشان نحفز اطفالنا اكتر للصيام ونعيشهم معانا الاجواء الرمضانية .. انا كنت طرحت فكرة في نطاق الاسرة والاصدقاء واطفال حضانتي والحمد لله حققت نجاح
#الفكرة_هي هانخليهم يصوموا نص يوم برضوا بس بالعكس يعني بدل مايصوم لحد الظهر او العصر وهو اصلا الفترة من الفجر الي هذا الوقت كان نايم #لا احنا هانخليه يصوم من الظهر او العصر علي حسب سن الطفل وصحته لحد أذان المغرب .. يعني هايصحي من النوم تأكليه كويس وده يبقي السحور بالنسباله وهايمسك بعدها الي ميعاد الافطار ... وهايفطر معانا بنفس الطقوس المعتادة .. الدعاء والتمر وياسلام لو يصلي معاكم
علشان يحس انه زيه زيك قدر يصوم لحد المغرب ويعيش معانا الاجواء الرمضانية ويحس بحلاوة وفرحة الافطار بعد الصيام
وطبعا علشان نقوي الفكرة دي عند اطفالنا لازم نحفزهم وندعمهم ولو بالدعم المعنوي .. يعني بالبلدي كده اعمليله فرح وعرفي الناس كلها ان ابنك صايم وفطر ع المغرب الاطفال بيحبوا كده
ومع الوقت هايتعود ويتعرف ع الاوقات الصحيحة للصيام والفطور ويكون عنده حافز اكتر انه يتبعها
وكل سنة وانتوا طيبين .. ورمضان كريم عليكم وعلي كل احبابكم
ليست هناك تعليقات